“Bvlgari”, “Moët & Chandon” зэрэг брэндийг эзэмшдэг тансаг зэрэглэлийн бүтээгдэхүүний “LVMH” компани зах зээлийн үнэлгээгээрээ дэлхийн “Топ-10” компанийн нэг болсны зэрэгцээ 500 тэрбум ам.долларын босго давсан Европын анхны компани болоход ойртож байна.
БНХАУ-д хатуу хөл хорио цуцлагдсанаас хойш иргэдийн тансаг зэрэглэлийн бүтээгдэхүүн худалдан авалт сэргэж, “LVMH”-ийн хувьцааны ханш дээд түвшинд хүрлээ. Ингэснээр тансаг зэрэглэлийн брэндүүдийг эзэмшигч Францын “LVMH” группийн үүсгэн байгуулагч Бернар Арногийн хөрөнгө 12 тэрбум ам.доллароор өсөж, 210 тэрбум ам.доллар болоод байна. Тэрээр хөрөнгийн хэмжээ нь 200 тэрбум ам.долларын босго давсан гурав дахь хүн болж түүхэнд бичигдээд байгаа юм.
Оны эхний улиралд “LVMH”-ийн арьсан эдлэл, загварын хувцас борлуулагч нэгжийн борлуулалт 18 хувиар өссөн нь шинжээчдийн таамгаас хоёр дахин өндөр үзүүлэлт болжээ.
Пүрэв гарагт “LVMH”-ийн хувьцааны ханш Парисын биржид таван хувиар өссөнөөр тус компанийн зах зээлийн үнэлгээ 485 тэрбум ам.доллар давсан байна.
Оны эхний гурван сард “LVMH” компанийн эзэмшдэг “Christian Dior”, “Tiffany” зэрэг брэндийн тансаг зэрэглэлийн бараа, бүтээгдэхүүний эрэлт эрчимтэй өссөн байна. Тайлант хугацаанд “LVMH” компанийн бараа, бүтээгдэхүүний борлуулалт Японд хамгийн өндөр дүнгээр буюу 34 хувиар өсжээ.
Харин Японоос бусад Азийн орнуудад органик борлуулалт нь 14 хувиар, Европт 24 хувиар өссөн байна. 2023 онд “LVMH” БНХАУ-ын зах зээлээс эерэг хүлээлттэй байгааг тус компанийн Гүйцэтгэх захирал онцлов.
I улиралд АНУ-д борлуулалт найман хувиар өссөн ч эрэлт саарч буй нь ажиглагдаж байгааг тэрээр дурдлаа. Хэдийгээр АНУ-ын хэрэглэгчдийн эрэлт хүчтэй сэргэхгүй байсан ч Европ болон БНХАУ-ын зах зээл дэх өсөлт урт хугацаанд тогтвортой байна гэсэн байна.
“LVMH” групп нь “Louis Vuitton”, “Tiffany & Co”, “Tag Heuer”, “Christian Dior” зэрэг хувцас хэрэгсэл, цүнх, бугуйн цаг, гоо сайхны бүтээгдэхүүн зэрэг тансаг ангиллын олон брэндүүдийг эзэмшдэг.
Цар тахлын дараа хүмүүсийн ахуй амьдрал сэргэж, тансаг эдлэлд мөнгө зарцуулах болсон нь тус компанийн орлогын өсөлтөд нөлөөлж байгаа гэж шинжээчид онцолж байна.
